അരളിയും,കിളിയും

തൂവ്വല്‍ പോലെ പൂ നിറവുള്ള

അരളിത്തുമ്പിലാണ് കൂട്.

തെറ്റാലിത്തുമ്പിലാണ്

ചോര മണമുള്ള ഉന്നം !

ഉച്ച പൊള്ളിച്ച

വെയില്‍ തിന്നും

ഇടറിവീഴും കിളിയൊച്ച.

ഞെട്ടറ്റ കൂട്ടിലെ കുഞ്ഞിന്റെ

വെളുത്ത ഹൃദയം മുറിഞ്ഞ
വേദനയെടുത്തിന്നു

സൂര്യനാറും.

ഇണക്കിളിയുറങ്ങാതെ

രാത്രി പേടിച്ചോടും

ഭയന്ന് വിറങ്ങലിച്ചു

നീയും , ഞാനും!

നമ്മുടെ കണ്ണിലെ

ചോര പോലെ

നരച്ച ഒരേ ആകാശത്തേയ്ക്ക്

പൂത്തുനില്‍ക്കും അരളിനിറം!